MÓJ HARPYNTA
Taki nyrol, taki szuszwol, pyndrok, bandzwół i harpynta!
Jak to przyszło, że jo dałam ty harpyncie sie łopyntać?
Łopowiadoł, że głos dźwiynczny mom jak ptok, co wiosnom kwili,
A na drugi dziń to samo godoł tyż Maryli!
Taki łatus, taki gówniorz, mynda, luntrus i harpynta!
Jak to przyszło, że jo dałam ty harpyncie sie łopyntać?
Godoł, że ón jyno zy mnom kciołby leżyć se we wyrze,
A na drugi dziń to samo łopowiadoł już Kaźmiyrze!
Taki pierdacz, taki zmiyrzglok, bździągwa, gupek i harpynta!
Jak to przyszło, że jo dałam ty harpyncie sie łopyntać?
Łopowiadoł, że mom giyry jak ta łania na makacie,
A na drugi dziń to samo godoł tyż Agacie!
Taki pener, taki bubek, luj, paterok i harpynta!
Jak to przyszło, że jo dałam ty harpyncie sie łopyntać?
Godoł, że jo jezdym zwiywno jak ta mgła poranno w lesie,
A na drugi dziń to samo łopowiadoł już Teresie!
Taki proszczok, taki cygon, nygus, pamper i harpynta!
Jak to przyszło, że jo dałam ty harpyncie sie łopyntać?
Łopowiadoł, że jak łodpust każde zy mnom je widzynie,
A na drugi dziń to samo godoł tyż Bożynie!
Taki glajdus, taki machlyrz, nur, brawynda i harpynta!
Jak to przyszło, że jo dałam ty harpyncie sie łopyntać?
Godoł, że jak mie dotyko, to mu prąd po krzyżach idzie,
A na drugi dziń to samo łopowiadoł już Jadwidze!
Taki jaźwiec, taki pyndrok, buc, aplegra i harpynta!
Jak to przyszło, że jo dałam ty harpyncie sie łopyntać?
Łopowiadoł, że miłości jegó dó mnie nic nie zgasi,
A na drugi dziń to samo godoł tyż Pelasi!
Taki nicpot, taki lorbas, szplin, psiajucha i harpynta.
Niech dziewuchom co kce godo, jo mu tegó nie pamiyntom! ..